Ziangh Ei Ging-sou: 24/04/2019

Ziangh Ei Ging-sou: 24/04/2019

2 Ti^mo^taai 4:1-5
Longx-Longx Kuinx Nyei Waac

“Oix zuqc zunh Tin-Hungh nyei doz. Maiv gunv maaih qangx fai maiv maaih qangx, zungv oix zuqc zunh aqv. Oix zuqc za’gengh longc noic longx-longx nyei njaaux, porv bun mienh mengh baeqc, gorngv-hemx, kuinx mienh.” (2 Ti^mo^tai 4:2)

Waac naaic bun meih hnamv: Baulo longx-longx kuinx haaix nyungc Ti^mo^tai? Zunh Tin-Hungh nyei doz nyei mienh se gorngv buangh zuqc kungx oix muangx ging-sou ei ninh mbuo nyei eix div zien leiz nyei mienh, meih hnangv haaix nor zoux bun? Ih jaax mbuo caux jiu-baang oix zuqc maaih buonc longc jienv nyei se haaix nyungc?

    Baulo longx-longx kuinx Ti^mo^tai nyei waac yiem naaiv douc ging-sou se yietc nyungc kuinx hatc nyei waac hniev nyei, weic zuqc naaiv Baulo maiv longc ei ninh ganh nyei eix hatc nyei waac , mv baac naaiv se Baulo dorng jienv Tin-Hungh yaac dorng jienv Giduc Yesu, dongh oix siemv ziangh jienv nyei mienh caux daic mingh nyei mienh, aengx oix daaih zoux Ziouv gunv mienh wuov dauh, longx-longx kuinx nyei waac. Ninh kuinx Ti^mo^tai oix zuqc zunh Tin-Hungh nyei doz. Maiv gunv maaih qangx fai maiv maaih qangx, zungv oix zuqc zunh aqv. Oix zuqc za’gengh longc noic longx-longx nyei njaaux, porv bun mienh mengh baeqc, gorngv-hemx, kuinx mienh. Baulo yaac mbuox ndaangc Ti^mo^tai ziangh hoc oix taux, mienh oix ngaengc maiv muangx maaih gorn-buonv nyei doz. Kungx oix ei ganh nyei hnyouv nyunc lorz fin-saeng camv nyei daaih njaaux puix ninh mbuo nyei m’normh oix muangx nyei. Mv baac fu-sux Ziouv nyei mienh maiv dungx gamh nziex, gunv bungx hnyouv Ziouv Tin-Hungh tengx mbuo hingh jiex, weic zoux ziangx Ziouv paaiv bun mbuo zoux nyei gong.

   Yiem naaiv mbuo buatc Baulo kuinx nyei waac, zunh Tin-Hungh nyei doz se maiv zeiz maaih qangx cingx daaih zunh, mv baac oix zuqc zieqv duqv naaiv se yiem Ziouv nyei nza’hmien mbuo oix zuqc zoux nyei buonc. Hnangv naaic fu-sux Ziouv nyei mienh oix zuqc mbenc ziangx hnyouv laengz siouv kouv, laengz ziepc zuoqv caux laengz maaih noic zoux ziangx Ziouv paaiv nyei buonc gong bun mbuo, maiv gunv mienh muangx fai maiv muangx.

   Ih jaax hnoi, ziex sinx mienh yiem naaiv lungh ndiev duqv njoux se weic kaux maaih mienh hnangv Ti^mo^tai nor siev maengc weic zunh kuv fienx. Mbuo hiuv duqv jiex daaih maaih camv mienh weic naaiv kuv fienx zuqc mienh zoux hoic, zoux doqc, maaih deix zungv zuqc guangc maengc weic kuv fienx duqv zunh cuotv. Liemh mbuo yaac kaux naaiv deix hnamv Ziouv nyei mienh siev maengc zunh kuv fienx bun, longc liuz hnyouv kuinx maiv gunv maaih ziangh hoc fai maiv maaih, liuz yiem mbuo jan-zei guoqv yietc baeqv hnyangx jiex daaih cingx duqv hnangv ih hnoi. Mouz norm Ziouv nyei jiu-baang caux mouz laanh Giduc mienh oix zuqc zieqv duqv ganh maaih buonc yiem zunh kuv fienx gong. Jiu-baang nyei douh zong bun mbuo buatc zunh kuv fienx gong nyei jauv maiv zeiz hungh hec zoux caux maiv zeiz ziangh biouv gitv hnangv mbuo ganh oix nyei. Hnangv naaic se gorngv mbuo bun ziangh hoc gunv mbuo, aqv fai longc maiv maaih gorn-buonv ei baamh mienh nyei oix njaaux, aqv fai kungx njaaux ei baamh mienh oix muangx nyei waac, ziouc baeng duqv mienh camv daaih gapv zunv mv baac ninh mbuo nyei lingh wuonh maiv duqv njoux yiem Ziouv nyei guoqv. Oix zuqc za’gengh ziepc zuoqv ei Ziouv njaaux nyei waac, ziouc maiv zuqc mienh nduov ei waaic nyei za’eix njaaux.

    Baamh gen baeng meih mingh leih Ziouv Tin-Hungh nyei waac nyei fai?

   O Ziouv aac, yie laengz zingh meih, yie ih zanc duqv njoux se weic kaux zinh ndaangc ziex dauh hnamv meih nyei mienh siev maengc zunh cuotv meih nyei kuv fienx. Tov Ziouv bun yie liuz hnyouv zunh meih nyei doz, maiv gunv maaih ziangh hoc fai maiv maaih, maiv gunv mienh muangx fai maiv muangx.

Longc buo hnyangx doqc Ging-sou: Matv^taai 18 zaang.

Xin vui lòng chuyển bài học Kinh Thánh để nhiều người cùng học.

Bài học Kinh Thánh này do Văn Phẩm Nguồn Sống biên soạn. Xin cầu nguyện cho Văn Phẩm Nguồn Sống. Nếu có thể được, xin vui lòng dâng hiến cho Văn Phẩm Nguồn Sống tại http://www.vpns.org

Thư Viện Tin Lành
www.thuvientinlanh.org