Thư Viện Tin Lành: Trang Nhà » Sống Với Thánh Kinh » Ziangh Ei Ging-sou: 17/03/2019

Ziangh Ei Ging-sou: 17/03/2019


Ziangh Ei Ging-sou: 17/03/2019

2 Hungh Douh 6:8-17
Longc Sienx Fim Nyei M’Zing Mangc

“E^li^saa ziouc daux gaux gorngv, “O Ziouv aac, tov bun naaiv dauh mienh nyei m’zing haih mangc duqv buatc.” Ziouv ziouc bun wuov dauh bou nyei m’zing haih mangc duqv buatc. Ninh mangc ziouc buatc maaih douz nyei maaz-cie caux maaz yiem wuov mbong weih gormx E^li^saa.” (2 Hungh Douh 6:17).

Waac naaic bun meih hnamv: Weic haaix diuc Silie hungh nyei baeng zuqc suei yiem ninh mbuo za’eix dangv damh jauv mborqv I^saa^laa^en mienh? Silie hungh hnangv haaix nor gorngv? Weic haaic diuc E^li^saa nyei bou gamh nziex dongh ninh buatc wuov deix win-wangv baeng weih gormx zingh? Tin-Hungh nyei mienh E^li^saa hnangv haaix nor tengx ninh nyei bou nyei sienx fim henv jiex daaih? Longc sienx fim nyei m’zing mangc fai orqv sin nyei m’zing mangc?

Silie guoqv zoux gau caux I^saa^laa^en guoqv mborqv jaax. Silie hungh cangh laangh caux ninh nyei baeng bieiv lorz norm dorngx liepc ciangv daaih bingx jienv weic daangv damh jauv mborqv I^saa^laa^en guoqv nyei baeng, mv baac zoux camv nzunc nyei yietc zungv nyei nzunc-nzunc Tin-Hungh mbuox nzengc ninh nyei douc waac mienh E^li^saa hiuv liuz mingh mbuox I^saa^laa^en hungh, hnangv naaic Silie hungh zuqc nzunc-nzunc suei yiem ninh mbuo nyei za’eix. Liuz dongh Silie hungh nyeiv ninh baeng guanh maaih mienh tengx bingx jienv mbuox fienx I^saa^laa^en guoqv nyei hungh, mv baac naaiv se Tin-Hungh nyei douc waac mienh E^li^saa mbuox hnangv. Dongh ninh mbuo hiuv hnangv naaic, Silie hungh ziouc lorz naaic gaax E^li^saa yiem haaix, lorz gau hiuv duqv E^li^saa yiem Ndotaan, naaiv dauh hungh paaiv guangh henv haaic nyei baeng caux maaz caux maaz-cie daaih weih gormx wuov zingh ziangh muonz. Taux da’nyeic ndorm Tin-Hungh nyei mienh nyei bou jiez sin daaih nziouv nyei, cuotv gaengh ka’ndau buatc baeng caux maaz caux maaz-cie weih jienv zingh aqv wuov dauh bou ziouc gengh gamh nziex haic mv baac douc waac mienh E^li^saa orn hnyouv nyei bou liuz daux gaux tov Ziouv koi nqoi ninh nyei bou nyei m’zing haih mangc duqv buatc. Ninh mangc ziouc buatc maaih douz nyei maaz-cie caux maaz yiem wuov mbong weih gormx E^li^saa.

Douc waac mienh E^li^saa nyei bou nyei sienx fim corc se lunx haic, ninh cingx daaih longc orqv sin nyei m’zing mangc, maiv gunv ninh ganh ninh nyei sai-diex yaac buatc ninh sai-diex zoux jiex ziex nyungc mbuoqc horngh nyei sic, siang jiex ninh nyei sai-diex haih hiuv duqv Silie hungh mbuo bingx jienv zoux nyei sic, mv baac ninh corc gamh nziex dongh ninh bautc naaiv win-wangv nyei cie weih gormx ninh mbuo. Daux nzuonx longc lingh wuonh nyei m’zing mangc, E^li^saa maiv maaih gamh nziex yietc deix, ninh aengx orn ninh nyei bou nyei hnyouv tengx ninh nyei bou nyei sienx fim henv faux daaih, E^li^saa tov Ziouv koi nqoi ninh nyei bou nyei lingh wuonh m’zing haih mangc buatc. Ziouv ziouc dau E^li^saa nyei waac bun douc waac mienh E^li^saa nyei bou nyei m’zing mangc buatc maaih douz nyei maaz-cie caux maaz camv haic yiem weih gormx ninh mbuo.

Longc orqv sin nyei m’zing ziangh, mbuo kungx buatc nyungc-nyungc yiem baamh gen nyei ga’naaiv hnangv, mv baac se gorngv longc lingh wuonh nyei m’zing ziangh nor mbuo ziouc buatc Ziouv nyei baeng weih gormx mbuo weic goux Ninh nyei mienh. Naaiv zaang nyei hoqc tengx orn hnyouv mbuo dongh mbuo zuqc win-wangv fai buangh zuqc haaix nyungc kouv naanc yiem mbuo nyei maengc. Orqv sin nyei m’zing kungx buatc kouv nyei jauv hnangv mv baac lingh wuonh nyei m’zing duqv koi nqoi ziouc buatc: “Ziouv nyei fin-mienh beu jienv taaih Ziouv nyei mienh yaac njoux ninh mbuo” (Singx Nzung 34:7).

Se gorngv meih maiv buatc Ziouv zoux gong yiem meih maengc nor oix zuqc zaah mangc gaax meih ganh nyei sienx fim caux meih zoux nyei sic oc. Meih hnangv haaix nor zoux weic longc sienx fim nyei m’zing mangc nyungc-nyungc?

O Ziouv aac, tov Ziouv koi nqoi yie nyei sienx fim nyei m’zing bun yie haih mangc duqv buatc Ziouv beu goux jienv yie, weic orn yie nyei hnyouv dongh yie buangh zuqc nyei yietc zungv kouv naanc.

Longc buo hnyangx doqc Ging-sou: Cuotv I^yipv 23 zaang.

Xin vui lòng chuyển bài học Kinh Thánh để nhiều người cùng học.

Bài học Kinh Thánh này do Văn Phẩm Nguồn Sống biên soạn. Xin cầu nguyện cho Văn Phẩm Nguồn Sống. Nếu có thể được, xin vui lòng dâng hiến cho Văn Phẩm Nguồn Sống tại http://www.vpns.org

Thư Viện Tin Lành
www.thuvientinlanh.org

©2012-2019 by Thư Viện Tin Lành

Scroll to top